Montbell брэндийг үүсгэн байгуулагч, Уулчин, Профессор Исамү Тацуно нь уулчдыг “сул дорой” хүмүүс гэж тодорхойлдог. Учир нь тэд үргэлж ирээдүйн талаар санаа зовж, эрсдэлийг урьдчилан тооцдог – жинхэнэ адал явдал хайгчид гэхээс илүү болгоомжтой төлөвлөгчид юм.

“Ихэнх хүмүүс үүнийг хүлээн зөвшөөрдөггүй л дээ. Гэхдээ энэ бол үнэн. Уулчид үргэлж 'бороо орвол яах вэ?', 'цас шуурвал яах вэ?' гэж бодож явдаг” хэмээн 77 настай Тацуно өөрийн Осака дахь оффистоо ярьжээ.

Энэ логикийг Тацуно бизнесийнхээ эхнээс л ашиглаж ирсэн бөгөөд, Montbell-ийг эрсдэлээс сэргийлсэн, урьдчилан төлөвлөсөн компанийн жишиг болгож чадсан юм. Үүний үр дүнд энэ жил Montbell 50 жилийнхээ ойг тэмдэглэж байна. Тэрээр инээд алдан “Бараг хэтэрхий амжилттай явж байна шүү” гэж хошигнон хэлэв.

Япон уулчдын үндсэн тоноглол

Өнөөдөр Montbell Япон даяар 140 гаруй дэлгүүртэй бөгөөд тус брэндийн тоноглол нь уулчид, аялагчдын үндсэн "хувцасны жишиг" болжээ. Гадаадын зах зээлд, ялангуяа Хонконг, Тайван, Хятадын жуулчид ч Montbell-ийг ихээхэн сонирхож, Осака дахь дэлгүүрт л гэхэд жуулчдын нөлөөгөөр борлуулалт 300% өссөн байна.

Анх 1975 онд компани үүсгэн байгуулагдахад Японы уулын болон аутдор зах зээлийн үнэлгээ ойролцоогоор 50 тэрбум иен (одоогийн ханшаар 349 сая ам.доллар) байсан бол тэр үед Тацуно 30 жилийн дотор 10 тэрбум иений борлуулалттай болно гэж төсөөлж байв. Гэвч өнөөдөр Montbell-ийн нийт борлуулалт 162 тэрбум иенд хүрээд байна.

“Компанийн өсөлт өөрөө л болсон юм. Би бараг оролцоогүй шүү дээ” хэмээн тэрээр инээмсэглэн хэлжээ.

/Тацуногийн 1980 онд гаргасан Montbell брэндийн бизнес төлөвлөгөө. Бизнесээ эхэлсэн үеэсээ Тацуно уулчин хүний логикийг ашиглаж амьд гарахын тулд үргэлж урьдчилж төлөвлөдөг. /

Ялагдсан үеэс эхэлсэн зориг

Тацуно Осака хотын өмнөд хэсгийн Сакаи хотоос гаралтай. Тэрээр 1947 онд, Дэлхийн II дайны дараа, балгас болсон хотод төржээ. Тэр үед Япон улс эдийн засгийн болон сэтгэл зүйн хямралд орсон байсан. Харин 1956 онд Япон уулчин Юко Маки Манаслу уулын оргилд (дэлхийн 8 дахь өндөр уул) хүрсэн амжилттай авиралт хийж, Япон үндэстэнд найдвар авчирсан юм. Энэ явдал Тацуно-д гүн урам зориг өгчээ.

/ Тацуно 1969 онд 21 настайдаа Швейцарийн Айгер ууланд авирч буй зураг /

Багадаа бие сул, тэжээлийн дутагдалтай байсан тул хичээл дээрээ ангийхантайгаа ууланд алхахдаа оролцож чаддагүй байсан нь түүний сэтгэлд том шарх үлдээсэн. Гэвч тэрээр өөрийнхөө мөрөөдлийг орхилгүй, биеэ чийрэгжүүлэн, уулчин болох замаа эхэлсэн байна.

Түүний бахархалтай авиралтуудын нэг бол 21 настайдаа (1969 он) хамтрагч Санжи Накатанитэй хамт Швейцарийн Эйгер уулын North Face-г Япон хүн анх удаа бүтэн туулж, амьд эргэж ирсэн явдал юм.

Montbell-ийн үүсэл

Тацуно анх Осака дахь худалдааны компанийн нэхмэлийн салбарт ажиллаж эхэлсэн бөгөөд уулчдын хэрэгцээнд тохирох, хөнгөн, хурдан хатдаг, авсаархан материал хэрэгтэй гэж үзсэн байна. “Бид хэрэглэгчид нь байсан болохоор юу хэрэгтэйгээ яг мэдэж байсан” гэж тэр хэлжээ.

1975 онд 28 настайдаа найзуудын хамт Montbell-ийг байгуулсан. Брэндийн нэрийг Франц хэлний "mont belle" (үзэсгэлэнт уул) гэх үгнээс санаа авсан бөгөөд баавгайн логог байгаль дэлхий, зэрлэг амьтдад хүндэтгэл үзүүлэх тэмдэг болгожээ.

Montbell эхний жилүүддээ найдвартай, боломжийн үнэтэй унтлагын уутаараа зах зээлд амжилтад хүрч чадсан, мөн бороотой нөхцөлд хэрэглэх хүрэм, өмд зэрэг шинэ технологийг хөгжүүлснээр маш хурдан амжилтад хөтөлсөн.

Японы загвар, залуу үеийнхэнд итгэх итгэл

Тацуно компанийнхаа бизнес загварыг уламжлалт Япон хэлбэрээр удирдаж ирсэн. “Насан туршийн ажилтны систем бидэнд хамгийн сайн тохирдог гэж би итгэдэг” гэж тэр хэлдэг. Жил бүр залуу ажилтнууд авч, тэднийг урт хугацаанд хөгжүүлэх нь компанийн өсөлтийн үндэс гэж үздэг.

Тэрээр одоо ч компанийн үйл ажиллагаанд идэвхтэй оролцож, бүтээгдэхүүний санаа, сэтгүүл засварлах, засгийн газартай хамтран ажиллах гээд олон зүйлд өөрийн биеэр оролцдог. “Надад хиймээр олон санаа байнга төрдөг үүндээ би дуртай. Бүр үнэхээр их дуртай” гэж хэлжээ.

/ 1960-д онд Миэ мужийн Гозайшо ууланд авирч буй зураг /

78 нас хүрэх гэж байгаа ч тэрээр тэтгэвэртээ суух бодолгүй байна. Харин хүү Такеши нь, одоогийн Montbell-ийн ерөнхийлөгч юм, зөвхөн Такеши л түүнийг тэтгэвэрт гаргахыг хүсэж байж магадгүй хэмээн тэрээр хошигнон ярив.

Ирээдүйд юу хүлээж байгаа вэ?

“Олон хүн надаас 'дараагийн зорилго чинь юу вэ?' гэж асуудаг. Гэхдээ би яг тийм зорилго гэж надад байгаа гэж боддоггүй. Би аль хэдийнээ энэ аялалдаа сэтгэл ханамжтай байна. Уул руу авирахдаа оргил нь чухал биш, харин замаа даган явах нь чухал. Бид өнөөдрөөр сэтгэл ханамжтай, маргааштаа санаа зоволгүй амьдрах ёстой” хэмээн Тацуно өгүүлжээ.