Энгийн нэгэн углааш дэлхийн брэнд болсон нь

Бразил хүнээс “Эх орон нь юугаар алдартай вэ” гэж асуувөл шууд л хөлбөмбөг, карнивал, самба болон Havaianas гэж хэлнэ. Эхний гурав нь магадгүй тайлбарлах шаардлагагүй ойлгомжтой байх. Харин Havaianas-ыг Монголчууд тэр болгон мэдэхгүй байх нь аргагүй. Тэгвэл энэхүү резинэн углаашны брэнд өнгөрсөн жил л гэхэд 220 сая хос углааш заржээ. Энэ нь жилийн туршид секунд бүрд 7 хос зарсан гэсэн үг юм.

1962 онд Японы зори хэмээх уламжлалт углаашнаас санаа аван бүтээсэн энэхүү брэнд өнөөдөр зах зээлийг байлдан дагуулсан бөгөөд манай улсад юм копидохыг Канондох гэдэг шиг зарим улсад углаашийг зүгээр л Havaianas гэж нэрлэдэг болтлоо түгжээ. Халуун орны ажилчин ангийн өмсгөлөөс high-fashion загварын тайз хүртлээ хөгжсөн Havaianas брэндийн тухай товчхон танилцуулъя.

 

Бразилын ажилчин ангийн өмсгөл

1962 онд Бразилын Alpargatas хэмээх спортын хувцас, хэрэгслийн томоохон группийн төлөөлөгчид Японоор аялаад ирэв. Тэд ганзага хоосон буцаж ирсэнгүй. Өмнө нь харж байгаагүй энгийн хавтгай ултай, салаа бүчтэй Японы уламжлалт зори углааш тэдний анхаарлыг татжээ. Бат бөх, хийхэд хямд төсөр бөгөөд хөлийг халууцуулахгүй... энэ гурван гол чанар нь Бразилд өдөр тутамд өмсөхөд гойд зохицохоор байлаа. Гэвч ганц л асуудал байлаа. Япон зори-г будааны сүрэл, даавуун бүчээр хийдэг бол энэ материалууд нь Бразилын чийгтэй, халуун агаарт тохиромжгүй байв.

Харин Бразилд энэ үед резинийн үйлдвэрлэл цэцэглэж байлаа. Ингээд сэргэлэн бизнесменүүд маань сэтгэн, байгаа нөөц бололцоогоо дайчлаад, анхны резинэн углаашийг бүтээжээ. Үүндээ тухайн үед Бразилчуудын аялах хамгийн дуртай, амралтын мөрөөдлийн арал болох Хавай арлын нэрийг өгсөн нь Португал хэлээр Хавайчууд буюу Havaianas (Хав-ай-анас) хэмээх брэндийг бий болгов.

Өмнөд Америк тивийн хамгийн том газар нутагтай Бразилд түгээлтийн сүлжээ хөгжөөгүй үе байлаа. Ингээд Havaianas багийнхан хэдэн Volkswagen микро автобусаар углаашаа дүүргэн, Бразилаар хөндлөн гулд борлуулалт хийж эхэлжээ. Худалдан авагч нарт Havaianas шууд таалагджээ.  Хөлд эвтэйхэн, ямар ч нөхцөлд өмсөж болох бөгөөд үнийн хувьд маш боломжийн байв.  2 жилийн дотор дэлхийд хүн амаараа эхний 10-т багтдаг Бразилын ажилчин ангийн хүн болгон дор хаяж нэг хос Havaianas углааш авч өмсчээ. Ямар ч брэндийн байр сууриа олсны илтгэл нь дуураймлууд гарч ирэх байдаг. Удахгүй Havaianas-ын дуураймал загварууд мөн худалдаанд гарч ирэв. Havaianas өөрсдийн резинэн улны жорыг нууцалж, загвартаа патент авахаар шийдсэн бөгөөд хэрхэн ориг Havaianas-ыг танихыг заасан кампанит ажил өрнүүлж эхэллээ.

 

20-иод жилийн туршид Havaianas Бразилын эдийн засаг, соёлд гүн шингэсэн брэнд болсны нэг илрэл нь 1980-аад оны сүүлээр Бразилын засгийн газар Havaiаnas углаашийг инфляцийг хянах, удирдахад хэрэглэдэг эдийн засгийн чухал үүрэгтэй бүтээгдэхүүнүүдийн хэрэглээний сагсанд оруулсан явдал юм. Товчхондооо Бразилийн эдийн засаг, мөнгөний бодлогод Havaianas углааш нөлөөлөхүйц үүрэгтэй болжээ. Ийнхүү өргөн хэрэглээний бараанд тооцогдож эхэлсэн нь нэг талаар Havaianas брэндийн тархалтыг илтгэж байсан боловч нөгөө талаар брэндийн нэр хүндэд тийм ч сайнаар нөлөөлсөнгүй. “Моодноос” гарч, талх мэт болсон Havaianas-ыг өмсөхөөс зайлсхийдэг, ичдэг залуу үе гарч ирэв.

Ингээд 90-өөд оноос эхлэн Havaianas брэндээ идэвхжүүлэн, шинэчлэл хийж эхэллээ. Цагаан ул, өнгөлөг бүчтэй байсан бол нилдээ нэг өнгөөр дагнасан моно загваруудыг гаргаж ирэв. Өнгөний сонголтоо ч мөн өргөжүүлж, резинэн улан дээрээ хэвлэл оруулан, одууд, алдартнуудтай хамтарсан сурталчилгааг Бразил даяар хийж, одууд ч энгийн даруу Havaianas өмсдөг болохыг харуулжээ.

Бразил нөлөө

Монгол соёлын нэг салшгүй эд анги, амин сүнс нь дээл байдагтай адил Бразил соёлын салшгүй нэг хүчин зүйл нь Havaianas болжээ. Баян, ядуугийн ялгаа асар өндөр, соёл, яс үндсээр баялаг бөгөөд эрс тэс  Бразилд бүгдийг нэгэн ижил түвшинд авчирдаг брэнд нь Havaianas болсон байна. Үүнийг Бразилчуудын бас нэгэн үндэсний соёлын баялаг гэж хэлж болох далайн эрэгтэй зүйрлэдэг.

“Далайн эрэг нь Бразилчуудын хувьд хамгийн эрх тэгш, ардчилсан орон зай юм. Дэлхийд алдартай Ипанема эрэг дээр очиход Бразилын хамгийн баян хүн, дундаж иргэн, ядуу зүдэрсэн нэгэн бүгд л зэрэгцэн далай ширтэн, элсэнд хөлөө шигтгэн суудаг. Яг үүнтэй адил Havaianas углааш бол хүн болгонд зориулсан. Хэн нэг нь өмсөөд, нөгөөх нь өмсөх ёсгүй, чадахгүй гэсэн зүйл огт байхгүй. Зөвхөн тодорхой хэрэглэгчид рүү хандаж эхлэх юм бол бид брэндийнхээ мөн чанарыг алдах болно” гэж Havaianas-ын захирал Эрик Страусс хэлжээ.

Олон улсад Havaianas бол Бразилын наранд илбүүлсэн, инээмсэглэл дүүрэн, тайван, эрх чөлөөтэй соёл, амьдралыг илэрхийлсэн брэнд юм.

Нууц жор

Углааш хийхэд олон хэсэг, эд анги ордоггүй нь ойлгомжтой. Тийм ч учраас юугаар яаж хийж байгаа нь маш чухал юм. 60-аад онд анх гарахдаа Havaianas Япон углаашийг сайжруулан, усанд гэмтдэггүй, үнэргүй бөгөөд илүү эдэлгээтэй болгосон нь зах зээлийг байлдан дагуулсан.

Нэгэн жарны дараа энэхүү онцлог хүчин зүйлс нь яг хэвээрээ хадгалагдан үлджээ. Одоо хийгдэж байгаа ихэнх углаашийг EVA хөөсөнцөр материалаар хийдэг  бол Havaianas-ыг нууц жорын дагуу байгалийн цэвэр резинэн түүхий эдээр хийдэг байна. Энэхүү нууц жорыг тогтмол сайжруулан, байгаль орчинд илүү ээлтэй, хөлд илүү тухтай болгосоор байдаг байна. Энэхүү жорныхоо нууцыг алдахгүйн тулд Havaianas-ыг эх орондоо 2 жижиг хотод байрладаг өөрсдийн үйлдвэрт л зөвхөн үйлдвэрлэж иржээ. 

Бразилаас Дэлхийд

90-д онуудад Havaianas Бразилын зах зээлд өнгөлөг, хэвлэлтэй загваруудыг төрөл бүрээр гарган, загварлаг, шинэлэг үеийг эхлүүлж байлаа. Тун удалгүй дэлхийн загварын ертөнц ч энэхүү углаашийг анзааран харсан байна. 1999 онд алдарт загвар зохион бүтээгч Jean Paul Gaultier Нью Йорк, Парисын тайзнаа өөрийн шинэ коллекцио танилцуулахдаа загвар өмсөгчиддөө Havaianas өмсгөсөн нь хүмүүсийн анхаарлыг ихээхэн татжээ. Далайн эрэг дээр л өмсдөг углааш гэж хардаг байсан хэвшмэл ойлголт ийнхүү үгүй болов.  

Зуныг мэдрүүлэх HAVAIANAS брэндийг "Би Ти Эф ХХК" албан ёсны эрхтэйгээр Монголдоо анх удаа оруулж ирэн, хэрэглэгч танд хүргэж байна.